Хятадын дипломат бодлого өөрчлөгдөж, “луугийн хумсаа” цухуйлгаж байна

Хятад 2050 он хүртлэх “түр хугацаанд” гадаад бодлогодоо тогтвортой байдалд хүрэхийг хичээж ажиллах болно хэмээн тус улсын шинжээчид үзэж байгаа гэнэ.

Хятад улс 2050 он хүртэл гадаад бодлогын стратегийн асуудалдаа “түр хугацаа”-ны бодлого гээчийг оруулж ирэхийн зэрэгцээ үндэсний ашиг сонирхолыг илүү хатуу хамгаалж, стратегийн тогтворжуулалтын тусламжаар үндэсний чухал эрх ашгийн тогтвортой байдлыг хангах гэнэ. Энэхүү Хятадын дипломатийн “байнгын өөрчлөлт”-ийн тухай тус улсын Дипломат хүрээлэнгийн захирал Цинь Яцин хэд хоногийн өмнө болсон “2015 оны Олон улсын асуудлаарх дээд хэмжээний чуулган”-д хэлсэн үгэндээ дээрх санааг дэвшүүлжээ.

Цинь Яциний үгээр сүүлийн үед гадаадын англи хэлээр гардаг хэвлэл мэдээллийн хэрэгсэлүүд олон улсын харилцаан дахь “Хятадын хүчирхэгжил” гэсэн онолын тухай мэдээлэх нь байнга өсөн нэмэгдэх болсон аж. Олон улсын нийгэмлэг Хятадын дипломат харилцаанд өөрчлөлт гарч байна хэмээн үзэж байгаа юм байна. Үүнд Хятад болон АНУ-ын хооронд дэлхийн тавцанд хэн нь тэргүүлэх вэ гэсэн сөргөлдөөн зайлшгүй гарна хэмээн үзжээ.

Мөн Хятадын дипломатизм урьдын бодлогоо “үргэлжлүүлэх үү” эсвэл “өөрчлөх үү” гэсэн асуудал гарч ирж байгаа юм.

Цинь Яцин Хятадын дипломат бодлого хуучин бодлогоо үргэлжлүүлэхийн зэрэгцээ бас бодлогын өөрчлөлт хийгдэх болно хэмээн үзэж байна.

Мөн тэрээр Хятадын дипломат бодлогод гурван төрлийн үргэлжлэх хугацаа байгаа хэмээсэн байна. “Хамгийн түрүүнд энэ бол стратегийн зорилго юм. 2050 он хүртэл Хятадын дипломатийн байнгын алба болох Хятадын нийгэм, улс төр, эдийн засгийн хөгжлийн асуудал хэвээрээ хадгалагдах болно. Хоёрт стратегийн чиг шугам юм. Том улс гол хүчин зүйл, бүс нутаг бол гол зүйл, хөгжиж буй улсууд үндсэн, харин олон талт харилцаа чухал байр суурь эзлэнэ. Гуравт энэ нь улс төрийн бодлогын арга хэрэгсэл. Хятадын гадаад бодлогын үндсэн онцлог нь ямар нэгэн эвсэлд үл нэгдэх, харин эдийн засгийн дипломат бодлогын хувьд урьдын адил зорилгодоо хүрэх тэр дундаа дотоод бодлогын асуудалд ч гэсэн” хэмээн Цинь Яцин хэлжээ.

Харин Хятад нь дипломат гадаад бодлогодоо ямархуу өөрчлөлт хийх вэ гэвэл хамгийн түрүүнд “Үндэсний амин чухал эрх ашгаа” тэргүүн зэрэгт тавина. Энэ нь гурван чиглэлтэй. Үүнд улс төрийн системийн аюулгүй байдал, газар нутгийн бүрэн бүтэн байдал болон эдийн засгийн хөгжил орж байгаа юм.

“Хятад өөрийн үндсэн эрх ашгаа хамгаалах илүү хатуу бодлого баримтлах бөгөөд өөрсдийн бодлогын хүчин зүйлийг илүү илэрхий харуулах болно. Хятадын гадаад бодлого өөрчлөгдөхдөө тогтвортой байдлыг шаардаж, өөрийнхөө үндсэн эрх ашгийг хамгаалахын зэрэгцээ өөрийн стратегийн бодлогоо тогтворжуулах болно” хэмээн Цинь Яцин цохон тэмдэглэжээ.

Өөрөөр хэлбэл Азийн хэт гүрэн дэлхийд ноёрхолоо тогтооход бэлэн байгаагаа илэрхийлж энэ удаа “Луугийн хумсаа” харуулах гэж байна.