Оросын “КрасАвиа” компани Улаанбаатараас Кызыл руу шууд нислэг үйлдэнэ

Шууд нислэг 10 дугаар сарын 2-ны өдөр хүртэл үрэгжлэх бөгөөд таван сарын хугацаанд нийт 23 нислэг үйлдэхэдээ суудлын дүүргэлт 72 хувтай байх буюу хамгийн бага гэхэд 1426 зорчигчийг тээвэрлэхээр төлөвлөжээ. Уг чиглэлээр 40-50 зорчигч тээвэрлэх багтаамж бүхий “AТР-42” онгоцоор нислэг үйлдэх юм.

 

ОХУ-ын Бүгд Найрамдах Тува Улсын Тээврийн яамны мэдээлснээр олон улсын нислэгийг үйлдэхэд 30,2 сая рубль зарцуулахаар төсөвлөсөн. Өөрөөр хэлбэл нислэг бүрт 1,3 сая рубль гаргах юм байна. Жуулчдыг татах зорилгоор Улаанбаатараар дамжин Сөүл, Токио, Бээжин, Хонконг зэрэг бусад улс руу нисэхээр захиалга өгөх боломжтой.

 

“КрасАвиа” компани нь анх 2025 онд Кызыл-Улаанбаатар чиглэлээр нислэг үйлдэхдээ нийт 761 зорчигч тээвэрлэсэн бөгөөд нэлээд асуудлыг шийдвэрлэж чадсаны эцэст хэрэгжүүлсэн гэнэ.

 

2018 онд Кызыл хотын нисэх онгоцны буудлыг шинэчлэх ажил дуусч шаардлагатай бүхий л тоног төхөөрөмжтэй болсноос гадна шинэ зурвас баригдсан. Энэ оны эхний улиралд Кызыл хотын нисэх онгоцны буудлын зорчигчдын тоо өнгөрсөн оны мөн үеийнхтэй харьцуулахад 12 хувиар нэмэгдсэн.

 

Оросын “Росавиация”-гийн орлогч дарга Наталья Андрианова, Эдийн засгийн хөгжлийн яамны сайд Максим Решетников нарын тэргүүлсэн төлөөлөгчид Тувад ажиллаж агаарын тээврийн хөгжил болон нисэх буудлын дэд бүтцийн шинэчлэл хэрхэн явагдаж байгаатай танилцжээ. Энэ үеэр төлөөлөгчид нисэх буудлын хөөрч буух зурвас, техникийн үйлчилгээ, хүлээлгийн танхимын үйл ажиллагааг онцгойлон авч үзсэн байна. Зорчигчдын урсгалыг зохицуулах, аюулгүй байдлыг сайжруулах, шуурхай үйлчлэх зорилгоор терминалыг бүсчлэн хувааж, ирэх болон явах зорчигчдыг тусгаарлах боломжыг судлахаар болсон.

 

ОХУ-ын Бүгд Найрамдах Тува улсын тэргүүн Владислав Ховалын мэдэгдсэнээр анх удаагаа олон улсын нислэг үйлдсэнээр олон улсын стандартад нийцэхүйц ямар ч төрлийн онгоц хүлээн авч, үйлчилгээ үзүүлэх бүрэн боломжтой харуулсан байна.