Хятад улс 2014 онд цэргийн дипломатын хүрээнд гаргасан амжилтаа нэрлэжээ

1.Малайзын агаарын тээврийн МН370 онгоцны эрэн хайх ажиллагаанд оролцов

Өнгөрөгч оны гуравдугаар сарын 8-наас тавдугаар сарны нэгэн хүртэл Хятадын арми 2273 хүнийг дайчилж, 9 тэнгисийн хөлөг онгоц, 6 хөлөг онгоцны нисдэг тэрэг, болон 5 байлдааны онгоц оролцуулан сураггүй болсон иргэний агаарын хөлгийг эрэн хайх ажиллагаанд оролцжээ. Иймэрхүү төрлийн тусгай ажиллагаа Хятадын армийн хувьд урьд өмнө байгаагүй туршлага болсныг china.org.cn сайт онцлон тэмдэглэсэн байна.

2. Хятад анх удаагаа Номхон далайн баруун хэсгийн орнуудын зэвсэгт хүчний жил тутмын зөвлөлдөх чуулганд оролцов

2014 оны дөрөвдүгээр сарын 22-23-ны хооронд Номхон далайн баруун эргийн орнуудын Тэнгисийн цэргийн хүчний 14 дэх жил бүрийн уламжлалт зөвлөлдөх чуулганд Хятадын тал оролцсон юм. Түүгээр ч барахгүй энэ удаагийн чуулганыг Хятадын арми өөрийн нутаг дэвсгэр дээрээ Циндао хотод зохион байгуулжээ.

3. Анх удаа Африк тивд Хятадын тэнгисийн цэргийн хөлөг онгоцнууд хүрэлцэн ирлээ

Өнгөрсөн оны тавдугаар сараас зургадугаар сарын хооронд Хятадын тэнгисийн цэргийн хүчний флотын хөлөг онгоцнууд Африк тивд хүрэлцэн ирж, Тунис, Сенегал, Кот-д’Иваур, Нигер, Камерун, Ангол, Намиб болон Өмнөд Африкийн БНУ-уудад ээлж дараалан зочилжээ. Эдгээр орнууд анх удаа Хятадын тэнгисийн флотын цэргийн хөлөлг онгоцнуудыг харсан нь энэ байлаа хэмээн china.org.cn мэдээлсэн байна.

4. Хамтарсан механикжуулсан хээрийн сургуулийг жинхэнэ байлдааны үйл ажиллагаатай илүү адил нөхцөлд явуулдаг боллоо

Сүүлийн үед Хятадын тал хуурай газар дээрх “Энхийн даалгавар”, тэнгис, далай дахь “Хамтын ажиллагаа” хэмээх цуврал байлдааны хээрийн сургуулийг тогтмолжуулж байна. Мөн ШХАБ-ын орнуудтай хамтран “Энхийн ажиллагаа-2014” хээрийн сургуулийг Монгол Улстай залгаа Өвөр Монголын нутагт хийсэн юм. Эдгээр хээрийн сургуулийг жинхэнэ дайн байлдааны үеийнхтэй ижил нөхцөлд ойртуулан хийдэг болсон хэмээн Хятадын армийнхан үзэж байна.

5. Хятад анх удаа Номхон далайн орнуудын тэнгисийн цэргийн хээрийн сургууль болох RIMPAC буюу Номхон далайн хөвөө ажиллагаанд- (the Rim of the Pacific Exercise) оролцов

RIMPAC буюу Номхон далайн хөвөө ажиллагаа- (the Rim of the Pacific Exercise) тэнгисийн хээрийн сургууль нь дэлхийд хамгийн томдоо орох олон улсын хамтарсан байлдааны цэргийн тэнгисийн сургууль юм. Энэ удаагийн буюу 2014 оны сургуулилтад долдугаар сарын 26-наас наймдугаар сарын нэгэн хүртэл 22 орон оролцжээ. Харин Хятадын тэнгисийн цэргийн хүчин анх удаагаа оролцсон байна.

6. Анх удаа олон улсын цэрэг спортын хоёр ч тэмцээнд оролцов

Хятадын цэргийнхэн өнгөрсөн онд ОХУ-д зохион байгуулагдсан олон улсын цэрэг спортын “Авиадартс-2014”, “Танкийн биатлон-2014” зэрэг тэмцээнүүдэд анх удаагаа оролцжээ.

7. Хятадын арми анх удаа Баруун Африк руу Эбола өвчинтэй тэмцэхэд нь тусламж үзүүлэв

Хятадын арми Баруун Африк руу цэргийн эмнэлэгийн бригадыг анх удаа явуулжээ. Энэ нь Хятад улс их гүрнийхээ үүргийг нэр төртэй биелүүлж байгаагийн илрэл боллоо хэмээн china.org.cn онцлон тэмдэглэсэн байна.

8. Хятад, АНУ хоёр анх удаа харилцан итгэлцэх механизм боловсрууллаа

Өнгөрсөн оны 11 дүгээр сарын 12-нд Хятад, АНУ-ын төрийн тэргүүнүүд “харилцан итгэлцлэлийн хоёр механизм” хэмээх баримт бичигт гарын үсэг зуржээ. Энэ нь цэргийн чухал үйл ажиллагааны мэдээллийг харилцан солилцох болон агаар, тэнгисийн орон зайд хамт байгаа тохиолдолд аюулгүй байдлаа харилцан хангах дүрмийн механизмууд юм.

9. “Сяншань” чуулганы нэр хүнд өслөө

Бээжинд 11 дүгээр сарын 20-22-ны хооронд Хятадын цэргийн шинжлэх ухааны холбооноос тав дахь удаагийн “Сяншань” чуулганыг зохион байгууллаа. Өмнөх дөрвөн удаагийн чуулганыг бодвол энэ удаагийн чуулган өндөр хэмжээнд болсон хэмээн Хятадын тал үнэлжээ. Өмнө нь энэ чуулганыг албан бус семинар хэмээн үздэг байсан гэнэ.

10. Анх удаагаа энхийг сахиулах батальон илгээв

Өнгөрсөн оны 12 дугаар сарын 22-нд Өмнөд Судан руу Хятадын явган цэргийн батальоныг энхийг сахиулагчаар илгээлээ. Өмнө нь хятадууд саперчдийн, тээврийн, эмнэлгийн болон цагдаагийн бүлгийг энхийг сахиулах ажиллагаанд оролцуулдаг байсан юм. Энэ удаагийн энхийг сахиулах батальон Хятадын армийн түүхэнд анхных нь юм хэмээн china.org.cn сайт бичжээ.