Хилсээр цаазлуулсан өвөрмонгол залуугийн хэрэгт холбоотой цагдаа, шүүгч нарт хариуцлага оногдуулахыг шаардав
Одоогоос 19 жилийн өмнө Хятадын шүүх тухайн үед 18 настай байсан өвөрмонгол залуу Хөгжилтийг хүчин, хүн амины хэрэгт тулган хилсээр цаазалсан билээ. Түүний хэргийг найз нь байсан, хэргийн цор ганц гэрч Ян Фэний (Yan Feng) мэдүүлгийн дагуу дахин хянан үзэх болсон юм.
Харин эдүгээ Өвөр Монголын шүүх хүн амины жинхэнэ гэмт хэрэгтнийг шүүж эхэлжээ.
Өвөр Монголын Шүүх иргэн Хөгжилтийн хүн амины хэрэгтэй холбоотой хэргийг дахин хэлэлцээд гэм буруугүй болохыг нь тогтоосны 21 дэх хоногт Хөх хотын Ардын дундын шүүхээс хүн амины жинхэнэ гэмт хэрэгтэн гэгдэж байгаа, хан үндэстэн Жао Жихун-д эрүүгийн хэрэг үүсгэн шалгаж байгаа хэрэг олны анхаарлыг татаж байна.
Жао Жихуны дээрэм хулгайн холбоотой олон хэргийг шүүхийн талаас холбогдох хууль тогтоолын дагуу нээлттэй шүүж байгаа юм. Харин түүний хүний амийг хөнөөсөн, хүчирхийллийн зэрэг гэмт хэргийг хаалттай шүүх ажээ.
Шүүх буруу шийдвэр гаргаж, Хөгжилтөд хилс хэргээр цаазын ял оноосныг дахин хянаж нягтлаад, түүнийг цагаатгаж, гэр бүлийнхэнд нь улсаас нөхөн төлбөр өгөх шийдвэр гаргажээ. Одоо жинхэнэ алуурчинд ялыг нь оноох цаг болсон аж. Харин Хөгжилтөд хилс хэрэг хүлээлгэж, ял оноосон цагдаа, шүүхийн ажилтнуудад хариуцлага хүлээлгэх ажлыг түргэн шуурхай хийх ёстой гэж олон нийт шаардаж байгаа юм.
Гэрэл зураг: http://asiarussia.ru
Үйл явдлын өрнөл: хилс хэрэгцаазын ялХятадӨвөр Монгол
