Дуурь бүжгийн театрт Монгол Улсын Консерваторийн концерт амжилттай тогложээ
Хөгжмийн үдэшлэгт Монгол Улсын консерваторийн багш оюутнууд тоглолтоо толилуулсан юм.
Концертийн өмнө Буриад улсын Засгийн газрын дэд дарга Евгения Лудупова, Буриадын соёлын сайд Соелма Дагаева нар үг хэллээ.
- Урлагийн коллеж, Монгол Улсын Консерватори хоорондын хамтын ажиллагааны ачаар ийм үр дүнд хүрч, манай зочид гайхалтай тоглолт болж байна. Консерваторийн захирал Ц.Шаравцэрэн, уран сайхны удирдагч Ц.Пүрэвхүү нартаа баярлалаа. Аугаа их Ялалтын 80 жилийн ойг угтаж бид олон төлөвлөгөөтэй байгаа. Эрхэм хүндэт анд нөхөд өө, энэ тоглолт бидэнд маш их сэтгэлийн таашаал эдлүүлнэ гэж найдаж байна. Манай хоёр ард түмний олон жилийн найрамдал, хамтын ажиллагаа мандтугай, - гэж Евгения Лудупова хэлэв.
Буриадын соёлын сайд Соелма Дагаева мөн зочдод олон жил үр бүтээлтэй хамтран ажиллаж байгаад талархлаа илэрхийлжээ. Тэрээр урлагийн коллежийн 20 орчим төгсөгчид Монгол Улсын Консерваторид амжилттай суралцаж дүүргэснийг сануулж байв. Мөн Буриадын соёлын яамны нэрийн өмнөөс Ц.Шаравцэрэнд Хүндэт жуух бичиг гардуулан өглөө.
Монгол Улсын Консерваторийн Симфони найрал хөгжим, удирдаач, Ардын жүжигчин Ч.Чинбат, мөн удирдаач Т.Юндэн нар үзэгчдийн сонорыг мялаав. Морин хуурын дөрвөлийн хөнгөн, аяндаа урсан эгшиглэх аялгууг сонсоод ханамгүй байв.
“Адуучин залуус” бүжгийн номерийг үзээд өнгө жавхаалаг, цовоо цолгиун монгол бүжигт сэтгэл хөвсөлзөөгүй хүнгүй байлаа. Балетийн номерууд мөн гайхалтай байв. Дуурийн дуулаачид, консерваторийн багш нар ч буриадын үзэгчдийг ёстой л хайрыг булаав.
Хоёрдахь хэсэгт Г. Цыдынжаповын нэрэмжит дуурь бүжгийн театрын гоцлооч Жамсо Бамбагаев, Надмит Надмитов үзэгчдийн сонорыг баясгасан бол, Соёлын коллежийн оюутан Михаил Зурбанов мөн уран бүтээл толилууллаа.
Эрхэм хүндэт зочид, Монгол Улсын консерваторийн захирал, профессор Ц.Шаравцэрэн, концертийн хөтөлбөрийн уран сайхны удирдагч, Урлагийн гавьяат зүтгэлтэн Ц.Пүрэвхүү нар ч урмын сайхан үг олныг хэллээ:
- Бид бүхний хайртай Улаан-Үд хотод бид хоёрдахь удаагаа ийм том тайлан концертийн бүрэлдэхүүнтэйгээр хүрэлцэн ирлээ. Үзэсгэлэнт Буриад орны мэргэжил нэгтнүүдэд бүгдэд нь талархлаа илэрхийлье. Өнөөдрийн концертийн зохион байгуулагч нь профессор Пүрэвхүү юм. Бид Буриадын хамгийн анхны хөгжимчдийг эргэн дурсахыг хүсэж байна. 1943 онд манай залуу хөгжимчдөд мэргэжлийн ур чадвар заахаар анхны багш нар маань ирж байсан юм. Та бүхэнд талархлаа илэрхийлье! - гэж Ц.Шаравцэрэн үзэгч олонд хандаж хэлэв.
Ц.Пүрэвхүү Монгол Улсын Консерватори 88 жилийн ойтойгоо золгож байгааг тэмдэглэв. Өнгөрсөн хугацаанд эндээс 10 мянга гаруй төгсөгч дээд боловсролын диплом гардан авчээ. Түүнээс гадна хэдхэн өдрийн дараа Монгол улсын Дуурь бүжгийн Эрдмийн Театрынхан айлчлан тоглолтоор хүрэлцэн ирнэ гэдгийг сануулан хэлсэн юм.
