Каллиграфийн урлагийн нэгдсэн холбоог байгууллаа
Монголын каллиграфийн урлагийн нэгдсэн холбоо /МКУНХ/-г байгуулж, нээлтийн үйл ажиллагааг энэ сарын 22-нд зохион байгууллаа.
Нээлтэд зориулан Соёл, спорт, аялал жуулчлал, залуучуудын яам, Нийслэлийн соёл урлагийн газрын дэмжлэгтэй 28 уран бүтээлчийн 40 бүтээлийн үзэсгэлэнг Уран зургийн галерейд дэлгэв.
Үзэсгэлэн энэ сарын 25-ныг дуустал олны хүртээл болно.
Энэ үеэр Шинэ цас үзэсгэлэнгийн хошой аварга, МКУНХ-ны Удирдах зөвлөлийн дарга Л.Түвшинжаргал холбооны зорилго, цаашдын үйл ажиллагаа, бүтэц бүрэлдэхүүний талаар танилцуулав. Тус холбоо хүндэт гишүүдтэй, Төлөөлөн удирдах зөвлөлдөө 7 хүний бүрэлдэхүүнтэй ажиллана. Мөн холбооны Гүйцэтгэх захирлын үүргийг Р.Эрдэнэболор гүйцэтгэх юм.
МКУНХ-ны хүндэт гишүүнээр дараах зургаан хүнийг өргөмжлөхийн зэрэгцээ гишүүнчлэлийн үнэмлэхийг гардууллаа.
Хүндэт гишүүд:
Хэл зохиолын хүрээлэнгийн хүндэт доктор Р.Отгонбаатар
Чингис хаан одонт, зохиолч, яруу найрагч Г.Мэнд-Ооёо
Каллиграфийн их мастер Т.Жамъянсүрэн
Монгол Улсын Гавьяат Багш, Каллиграфийн их мастер Д.Батбаяр
Доктор, профессор С.Бадрал
Монголын орчин үеийн каллиграфийн холбоог үүсгэн байгуулагч, каллиграфийн их мастер Д.Баттөмөр агсны гэргий Б.Баярцэцэг
