Өчүүхэн тойн догшин чөтгөрийг номхтгосон нь

Огторгуй дор нисгэгч шувуун бээр сүмийн дэргэд хүрвээс хөсрөө унан үхэдхийх тийм нэгэн догшин хүчит чөтгөр бөлгөө.

Тэндээс Энэтхэг улсад аливаа үйлийг тарниар чадагч аугаа хүчит нэгэн тарнич бөлгөө. Тэр тарнич тарниа уншаад сац хамаг догшин бүгд хүлэгдэх болоод адилтгаваас ноён нь боол шивэгчинээ зарах мэт тэр тарнич бээр хамаг ад чөтгөр эрх үгүйеэ заран чадагч тийн хүчит бөлгөө. Тарнич ирээд тэр догшин чөтгөрийг номхотгосугай хэмээн сэтгэж тарнич сүм дотор ороод дээр их дуугаар тарнисыг урив. Шөнө дөл цагт тэр догшин чөтгөр нь тарнич сангасвагийн үесийг нь огтолж тэргүүнийг нь бээр хоёр анги болгон хагалж алав.

Үүр гийж нар ургасаны хойно тэр тарничийн үхсэнийг мэдэв. Тэндээс тэр тарничид ав алийг тойндоо оруулан чадагч тийм нэгэн бээр тарнич багш бөлгөө. Тарнич тэр багш өөрийн шавь юугаа муу чөтгөрт алагдсаныг мэдээд тарнидсан хамаг хэрэглэгдэхүүнийг аваад тэр сүмд орж муу үнэрээр утаж маш хилэгнэхүй ёсоор тарнийг догшин дуугаар урив. Тэр чөтгөр нь тэр тарничийн зүрхэнд орж амнаас цусаар бөөлжүүлж даруй дээр үхүүлэв.

Тэр сүмээс хол бус нэгэн газарт Очироор огтлогч судрыг уншигч нэгэн өчүүхэн тойн бөлгөө. Тэр тойн тэр муу чөтгөр тарничийг алсаныг мэджээ. Аяа хөөрхий маш муу хилэнцэт тул тэр хийд дор очиж Очироор огтлогчийг уншсугай хэмээн сэтгэж хүжсийн сав аваад одохуй дор тэндэх газрын хамаг улс өгүүлрүүн: 

Аяа тойн оо: Чи аюулт орноо бүү од. Амьд гарч үл ирмүй. Тэр хоёр тарничийг үхүүлсэн гэх ажээ. Хэн ч түүн дор халдаж яахан чадмуй. Хөгшин ураг хийгээд бидний сэтгэлийг бүү зовоотугай, хэмээн сургасанд тойн өгүүлрүүн: 

“Та бүгд сонс. Ялж төгс нөгчсөн бурхан багш бусад дор багш болоод надад багш үл болох бус билээ. Дээдийн ном зарлиг омтгойгүй буюу. Эл шар хувцас өмсөж санваар сахисан хувраг, амьтныг нигүүлсэхүй үгүй бөгөөд найдангүй хорт тачаах сэтгэлтэй болвоос шагшаабад санваар эвдэрч, муу заяанд унахаас бус юун буй.Тиймийн тул тэр гурав хийгээд амьтны тусын тулд зоримуй" хэмээгээд одсон дор тэр олон улс тэр тойныг үнэхээр үхэхийн үйлэн ирсэн буйза. Сургаж ятган хэлэвч үл болох ажгуу" хэмээн өгүүлэлдэв. Тэндээс тэр тойн сүм дор ороод нэгэн үзүүрт сэтгэлээр Очироор огтлогч судрыг уншин суув. 

Шөнө дөл цаг дор үүл хураад гилбэлгээнээр цахилан, газар ихэд хөдлөөд, догшин мөндөр хур хийгээд их улаан салхи болж, мод унах, уул эвдэрч, их далай долгилсон цалгивай. Тэр орны догшин тэнгэр түүний дараагаар маш айх мэт амнаасаа гал бадруулан, хамраасаа утаа бургиулж, аливаа зүйлийн муу дуугаар хашгиран, гартаа зүйл бүрийн мэсэн барьсан, мөн өөрийн дүртэй олон нөхдөөр хүрээлүүлэн, бие нь асар их аймшигт чөтгөр болон хувилж, сүм дотор орж ирсэн дор тэр өчүүхэн тойн сүрдэх айх сэтгэл үгүй "Аяа хөөрхий, муу үйлийн үрээр ийм дүрс авсан их зовлонт амьтан буйза" хэмээн нигүүлсэн сэтгэж, Очироор огтлогчийг уншин сууваас тойн дор хэлж тэмцэх сэтгэл үгүй номын дуун сонсоод олон чөтгөрийн сэтгэл амирлангуй болж, тэр тэнгэр өөрийн угийн биеэр болон хувилав. Түүний олон нөхөд тархан одов. Огторгуйн үүлэн арилж, аливаа үйлс сайн болвой. Тэр догшин тэнгэр ганцаар үлдэж хоцроод ийн өчрүүн: 

«Аяа тойноо: Би бээр аугаа хүчин чадал их, намайг газрын хүн амьтан байтугай хэн ч үл чадах буй. Надад айх сэтгэл өчүүхэн ч үгүй бөлгөө. Тийн атал чиний амийг таслахаар ирээд уур хилэн минь номхорч, хүчин чадал ихэд доройтсон бололтой санагдмуй» хэмээн бишрэхүйн сэтгэлээр алгаа хавсарч баруун өвдгөөрөө хөсөр сөгдөн ийн өгүүлрүүн: 

Аяа тойноо намайг нигүүлсэгч энэ судрын дууг сонсгон соёрх хэмээн өчсөн дор тэр тойн өгүүлрүүн: 

Энэ номоор урьд нөгчсөн. Түүнчлэн ирсэн бурхад номлосон эдүгээ ялж төгс нөгчсөн бурхан номлосон Билгийн чинад хязгаараа хүрсэн очироор огтлогч тэр их хөлгөн судар буйза. Үүнийг уншваас, бичвээс, авбаас, дууг сонсвоос аливаа сайн үйл бүгдийг дэлгэрүүлэх муу хилэнц үйл бүгдийг сөнөөн арилгагч адистидийн аугаа хүчин огоот төгсгөсөн судар болой. Аливаа ном номлогчийг багш лам хэмээн өргөн хүндлэх ёстой. Ном сонсгогчийг шавь, өглөгийн эзэн хэмээн асран тэтгэх өршөөх ёстой бөлгөө.

Тиймийн тул би бурханы сургаалаар нүгэл хилэнц үйл бүгдийг тэвчиж хамаг амьтанд туслах буяны үйлээс бус явдал надад үгүй. Чи бээр омог дээрэнгүй хийгээд уур хилэн ихтэй. Нүгэл хилэнцийг цээрлэхгүй, бусдын зовлонг мэдэж асрах сэтгэлгүй зэрэг харш явдал чам дор олон буй. Ялангуяа амьтны амийг хорлох тэргүүтэн бэрх нүгэл хилэнцийг чи үйлдэх тул бидэн хоёрын тангараг үл нийлмүй» хэмээсэн дор тэр догшин тэнгэр ийн өгүүлрүүн: 

“Би эдүгээгээс хойш алив нүгэл хилэнцийг тэвчиж, бурханы сургаалаар явж, шашин дор тус хүргэсүгэй» хэмээгээд Очироор огтлогч номыг сонсож номонд ороод номхотвой. Тэр тойн Очироор огтлогчийн адистидаар догшин тэнгэрийг ном дор оруулсаныг тэр орны хамаг улс дуулж мэдээд, Очироор огтлогч судрыг бичих, бичүүлэх хийгээд удирдан авч ядам болгон унших, уншуулах олон зүйлийн тахил өргөх ба боодол баринтаг өргөх,орой дээрээ залж гэр хүрээгээ тойрон эргэх, залбиран мөргөх зэрэг тус тусдаа аль болохоор тахиж шүтсэний буянаар энэ насан дор цаг бусын үхэл, зовлон үгүй, урт наслан хойд насандаа сайн төрлийг олцгоов.