Сэлбэ төслийн 26 байршлын 41 га газрыг эдийн засгийн эргэлтэд оруулах хувийн компаниудыг урьж байна
Сэлбэ 20 минутын хот"-ын төслүүдэд хувийн хэвшилтэй хамтарч ажиллах санал авч эхэллээ.
Энэ талаар "Сэлбэ 20 минутын хот" корпорац ХХК-ийн гүйцэтгэх захирал У.Баатар "Улаанбаатар хот анх удаа 158 га газрыг чөлөөлж, бие даасан хотын дэд төвийг бий болгох гэж байна.
Сэлбэ дэд төвд зөвхөн орон сууцны хорооллоос гадна сургууль, цэцэрлэг, төрийн үйлчилгээний төв, спорт комплекс, худалдаа үйлчилгээний төв, улсын циркийн барилгыг барихаар төлөвлөсөн юм.
Ойролцоогоор 18 км авто зам, 43 км явган хүний зам, 28 км дугуйн замыг тавина. Нийт талбайн 40% буюу 50 га газарт ногоон байгууламжийг бий болгоно. Сэлбэ төсөлд хувийн хэвшилд бизнесийн ашигтай байршлуудыг санал болгож, selbecity.mn цахим хуудсыг өнөөдрөөс нээж байна. Цахим хуудаст урилгууд харагдана. Төслийн 26 байршлын 41 га газрыг эдийн засгийн эргэлтэд оруулахаар хувийн хэвшилтэй хамтарч ажиллах саналыг хүлээж авч эхэлж байгаа юм. ААН-үүд хамтарч ажиллах хүсэлтээ уг цахим хуудсаар илгээнэ.
41 га газраас 26 га талбайн ерөнхий төлөвлөгөө батлагдаж, инженерийн шугам сүлжээний зураг төсөл хийгдсэн, энэ жил бүх ажил зэрэг эхэлнэ. Бүтээн байгуулагчид, үл хөдлөхийн хөрөнгө оруулагчид, үйлчилгээний зах зээлд ажилладаг бүх байгууллагыг урьж байна" гэж мэдээллээ. Хамтын ажиллагааны журмыг боловсруулж байгаа бөгөөд хувийн компаниудаас 10 хоногийн хугацаанд санал авахаар болжээ.
