Оросын хэвлэлд өгсөн ярилцлагадаа Дээрхийн гэгээнтэн Далай лам Дэлхийн III дайны тухай дурьджээ

“Би Дэлхийн III дайны бодит аюул занал байгаа гэж бодохгүй байна. Хэн нэгэн цөмийн зэвсэг хэрэглэж зориглох нь юу л бол. Цөмийн пуужин хөөргөх товчлуур дарах эрхтэй солиотон олдоно гэж үү” хэмээн Шинэ оны өмнөхөн РИА Новости агентлагт өгсөн тусгай дугаарын ярилцлагадаа өгүүлжээ.

Тус ярилцлагадаа Дээрхийн гэгээнтэн Далай багш Дэлхийн III дайн болно гэдэгт итгэдэггүй гэдгээ хэлээд дэлхийн геополитикийн нөхцөл байдлыг сайжруулахын тулд сэтгэлийн хөөрлөө барьж, “өөрийнх”, “хүнийх” гэж ялган хуваадагаа болихыг уриалсан байна.

Дээрхийн гэгээнтний үгээр бол сүүлийн үед хүмүүс цэнхэр гарагаа цөмийн аюул заналаас чөлөөлөхийн тулд цөмийн зэвсэглэлийг хэрхэн хорогдуулах, түүнийг бүрмөсөн устгах тухай илүү их ярьдаг болсон гэнэ.

Түүний хажуугаар зарим нэг улс орнуудын хувьд хоорондын харилцаа нь “үнэхээр хурцдмал” байгааг хүлээн зөвшөөрчээ. “Мөргөлдөөнд татагдан оролцож буй хүмүүс сэтгэлийн хэт хөөрөлд автсан. Бид “өөрийн”, “хүнийх” гэсэн тодорхойгүй саад босго тавьсаар байх юм бол тэд энэ зөрчилдөөнөөс гарч чадахгүй. Сэтгэлийн хэт хөөрөл хүний оюун ухааныг бүрхэж, тэр нь хяналтаас гарвал бид ургуулан бодох дэс дараалалаа алдана. Ингэснээр бид эрүүл ухаанаар сэтгэхээ больж, бүх хүн төрөлхтөний хувь заяа нэг гэдгийг олж харахаа болих юм” хэмээн Буддын шашны тэргүүн хэлсэн ажээ.

Буддизм нь Оросын уламжлалт дөрвөн гол шашны нэг (1741 онд Оросын хатан хаан Елизавета Петровнагийн зарлигаар хүлээн зөвшөөрөгдсөн юм байна) бөгөөд дэлхийн хамгийн эртний шашнуудын нэг билээ. Эдүгээ Орос оронд Буддын шашныг шүтдэг сая гаруй хүн байдаг гэнэ. Орост XVI-XVII зууны үед Буддын шашин хамгийн их тархсан үе агаад сүсэгтнүүд нь гол төлөв Баруун Монголоос хүүн ирсэн халимагууд болон Сибирийн өмнөд хэсгийн буриадууд байсан юм хэмээн РИА Новости онцлон тэмдэглэжээ.

Орос улсад Дээрхийн гэгээн Далай лам цөөн удаа ирж байсан агаад хамгийн сүүлд 2004 онд Халимагт айлчилж байсан юм.

Сүүлийн жилүүдэд Оросын буддистууд өөрсдийн бүс нутагтаа Далай багшийг харна хэмээн найдаж энэ талаар хүсэлт саналаа уламжилж буй боловч Хятадын зүгээс үзүүлж буй эсэргүүцлийн улмаас Дээрхийн гэгээнийг Орост урих асуудал хойшлогдсоор ирсэн билээ. Тэр бүү хэл 2011 оны хавар Дээрхийн гэгээн өөрийгөө “Түвдийн засаглалын эрх мэдлээс” чөлөөлсөн ч Бээжин түүнийг БНХАУ-аас Түвдийг салан тусгаарлах гэж байна хэмээн буруутгасаар байгаа юм.

Орчуулсан Майдар Сосорбарам.