Жуулчдын аюулгүй байдлыг хангах зорилгоор 62 оюутан цагдааг цагийн 15 мянган төгрөгөөр ажиллуулж байгаа
Монгол Улсыг зорин ирж байгаа жуулчдын аюулгүй байдлыг хангах, гэмт хэрэг, зөрчлөөс урьдчилан сэргийлэх ажлын хүрээнд ”Оюутан цагдаа-2025” хөтөлбөрийг хэрэгжүүлж эхэллээ.
Энэ тухай Нийслэлийн Цагдаагийн Удирдах Газрын Хэв журмын хэлтсийн дарга Л.Амармөрөнгөөс тодруулахад "Улаанбаатар хотын их, дээд сургуулийн 62 оюутан цагдаа зуны туршид гадаадын жуулчдын аюулгүй байдал, гэмт хэрэг зөрчлөөс урьдчилан сэргийлэх болон шаардлагатай мэдээ мэдээллээр хангаж ажиллах бөгөөд одоогийн байдлаар 62 оюутан цагдаа бүгд ажиллаж байна.
Гадаад хэлний мэдлэгийн түвшнийг үндсэн шалгуур болгож оюутан цагдаа нарыг сонгосон. Тэд зургаадугаар сарын 12-ноос эхлэн наймдугаар сарын 10-ны өдрийг хүртэл хоёр сарын хугацаанд өдрийн найман цагаар ажиллана. Нэг цагийн хөлсийг арван таван мянган төгрөгөөр бодон цалинжуулж байгаа. Үүнээс шимтгэл, нийгмийн даатгал зэргийг хасаад сард oюутнуудын гар дээр нэг сая таван зуун мянган төгрөг очихоор тооцоолсон" гэлээ.
Оюутан цагдаа нь гадаадын иргэд жуулчдын тоо ихээр нэмэгддэг зуны улиралд тэднийг гэмт хэрэг, зөрчлөөс урьдчилан сэргийлэх, хэрэгцээт мэдээ, мэдээллээр хангах, дэмжлэг туслалцаа үзүүлэх, зөвлөгөө өгөх, аялал жуулчлалын үйл ажиллагаатай холбоотой газар, үйлчилгээний цэг байршлын талаарх шаардлагатай мэдээллийг түргэн шуурхай хүргэж ажиллах зорилготой байна. Нийслэлийн гэмт хэргээс урьдчилан сэргийлэх ажлыг зохицуулах салбар зөвлөл, Нийслэлийн Цагдаагийн удирдах газар, Монголын Оюутны холбоотой хамтран тус хөтөлбөрийг хэрэгжүүлж байгаа аж.
