Номын баярт Орос, Хятад, Солонгос, Польш улсын төлөөлөл оролцож байна
"Үндэсний номын баяр-2025" арга хэмжээ үргэлжилж байна. 37 дахь жилдээ жилдээ зохион байгуулагдаж буй “Номын баяр” 2025 оны тавдугаар сарын 16-18-ны өдрүүдэд Д.Сүхбаатарын талбайд болох юм.
Энэ удаагийн номын баярыг “Илүү их уншъя” уриан дор зохион байгуулж байгаа.
Номын баярын үеэр ном, соёлтой холбоотой олон талт үйл ажиллагааг олны хүртээл болгож, хүүхэд багачуудад зориулсан сонирхолтой арга хэмжээг зохион байгуулахаар төлөвлөсөн байна.
Ерөнхийлөгч бодлого, үйл ажиллагааныхаа хөтөлбөрт “Номын сайн нөхөр” хөдөлгөөн өрнүүлэхээр тусгаж, монгол хүнийг номтой нөхөрлөж соён гэгээрэх үйл явцыг нь дэмжих зорилго тавьсан юм. Ерөнхийлөгчийн Тамгын газрын дарга Г.Занданшатар“Номын баяр”-ын нээлтэд хэлсэн үгэндээ "ард иргэд, хүүхэд, залууст ном унших соёл, дадал хэвшүүлэх, түгээн дэлгэрүүлэх, сурч хөгжих хүсэл эрмэлзлийг дэмжихэд “Номын баяр” чухал үүрэгтэй бөгөөд зохиолч, туурвигч, идэвхтэн бичигчид гол хөтөч, түүчээ нь юм" гэдгийг онцолсон юм.
Ням гарагт өндөрлөх баярт дотоодын 500 гаруй зохиолч, хэвлэн нийтлэгчээс гадна Орос, Хятад, Солонгос, Польш Улсын төлөөлөл оролцож байна.
Энэ үеэр зохиолч, хэвлэн нийтлэгчид бүтээлээ нийтэд толилуулж, үзэсгэлэн, уралдаан, өдөрлөг, уншигч, зохиолчдын уулзалт, шинэ номын нээлт, сэдэвчилсэн бүтээлийн танилцуулга зэрэг үндэсний бичиг соёлоо сурталчилсан, ном унших идэвх, санаачилгыг өрнүүлсэн олон арга хэмжээ, соёл, урлагийн тоглолт болох юм.
