ОХУ-ын нэрт монголч эрдэмтэн, археологич С.В.Даниловын “Избранные труды” 2 боть бyтээлийн нээлт болов

Нэрт археологич С.В.Данилов нь эрт болон дундад зууны үеийн Төв Ази, Байгаль орчмын бүс нутгийн хүрэл зэвсгийн үе, хүннү, скиф, дундад зууны үеийн нүүдэлчдийн эртний түүх судлалаар мэргэшсэн судлаач байсан бөгөөд 1981 оноос Буриадын нутаг дэвсгэрт, 1999 оноос Монгол улсын нутаг дэвсгэрт археологийн малтлага судалгааг явуулах болж Төв азийн эртний төрт улсууд болох Хүннү, Уйгур, Хятан гүрний үеийн хот суурин, булш оршуулгын судалгаанд өөрийн ухамсарт амьдралаа зориулсан юм.

С.В.Данилов нь Төв азийн эртний нүүдэлчид гэсэн ерөнхий сэдвийн хүрээнд тэдний эдийн засаг улс төрийн амьдралын хувирал өөрчлөлт, худалдаа арилжаа, нүүдлийн нийгмийн бүтцийн талаар өргөн хэмжээний судалгааг явуулж, эртний нүүдэлчдийн оршуулгын болон тахил тайлгын байгууламж, хот сууриныг өргөн хүрээнд судалсан эрдэмтэн юм. 

ШУА-ийн Түүх, угсаатны зүйн хүрээлэн, Оросын ШУА-ийн Сибирийн салбарын Монгол, түвэд, буддын судлалын хүрээлэн хамтран нэрт эрдэмтний бүтээлийн чуулганыг 2 ботиор хэвлэн олон нийтийн хүртээл болгов. Энэхүү номын нээлт Буриадын Монгол судлалын хүрээлэнд болж эрдэмтний ар, гэр, хамтран зүтгэгчид, шавь нар нар нь оролцов.  Тус хуралд ОХУ-ын ШУА-ийн жинхэнэ гишүүн академич Н.Н.Крадин, Түүх, угсаатны зүйн хүрээлэнгийн захирал доктор Л.Эрдэнэболд, Иркутскийн Улсын технологийн их сургуулийн профессор А.В.Харинский, Кемерова мужийн улсын их сургуулийн профессор С.А.Васютин нар нэрт эрдэмтний бүтээл, туурвилын талаар илтгэл хэлэлцүүллээ.