Буриадад болох анагаах ухааны форумд Монгол, Хятадын шинжээчид оролцоно
"Буриадын уламжлалт анагаах ухаан: эрүүл мэндийн төлөөх инновациуд" олон улсын форум ирэх гуравдугаар сарын эхээр Буриадад болно.
"Буриадын уламжлалт анагаах ухаан: эрүүл мэндийн төлөөх инновациуд" хэмээх Олон улсын форум ирэх 3 дугаар сарын эхээр Буриадад болох бөгөөд Орос, Монгол, Хятадын шинжээчид оролцоно. Дорж Банзаровын нэрэмжит Буриадын Улсын их сургуулийн (БГУ) захирал Алдар Дамдинов энэ тухай мэдээллээ.
"2025 оны 3 дугаар сарын 4-6-ны өдрүүдэд Буриадын Улсын их сургуулийн уламжлалт анагаах ухааны Хүрээлэнд "Буриадын уламжлалт анагаах ухаан: эрүүл мэндийн төлөөх инновациуд" олон улсын форум болно. Оросын мэргэжилтнүүд, мөн Монгол, Хятад улсуудаас шинжээчид ирнэ”, - гэж Дамдинов мэдээллээ.
Энэ арга хэмжээнд оролцогчид хүн амын эрүүл мэндийг хамгаалах системд уламжлалт анагаах ухааныг нэвтрүүлэх асуудлуудыг хэлэлцэнэ. Хятад болон монгол уламжлалт анагаах ухаан, судас оношилгоо, зүү эмчилгээ, тан барих талаар семинар, сургалтууд болон болон “Сэргээн засах эмчилгээний үеийн остеопати” сургалтын хөтөлбөрийг зохион байгуулна.
Оролцох шинжээчдийн дунд И.М. Сеченовын нэрэмжит Москвагийн Анагаах ухааны Улсын Анхдугаар Их сургуулийн сэргээн засах, рашаан сувиллын тэнхимийн эрхлэгч Александр Разумов, Төрийн Думын эрүүл мэндийг хамгаалах хорооны нэгдүгээр орлогч дарга Бадма Башанкаев, БНХАУ-ын Хэйлунцян мужийн хятадын уламжлалт анагаах ухааны төвийн Клиник судалгааны төвийн дарга, мэдрэл сэргээн засал, тархины үйл ажиллагаа судлалын лабораторийн захирал Тан Цян, Монгол улсын “Мажаа” эмнэлгийн ерөнхий эмч Бямбаа Мягмарсүрэн болон бусад хүмүүс байна.
1989 оноос хойш Улаан-Үд хотод ажиллаж байгаа Дорно дахины анагаах ухааны Төвийн эмч нар туршлага, дадлагаа хуваалцана. 2024 онд тус төвд 9900 гаруй хүн эмчилгээ, сэргээн засал хийлгэсний 182 нь цэргийн тусгай ажиллагаанд оролцогчид байна. Форумын үеэр мөн ОХУ-ын ШУА-ийн Сибирийн салбарын Буриадын эрдэм шинжилгээний төвийн ажилтан эрдэмтэд лекц тавина.
Мэргэжилтэн бэлтгэх талаар
Буриадын Улсын их сургуулийн Уламжлалт анагаах ухааны хүрээлэн болон Анагаах ухааны хүрээлэн бол Улаан-Үд хот хотноо мастер төлөвлөгөөний хүрээнд байгуулагдах “Байгаль” их дээд сургуулийн кампус барих төслийн чухал хэсэг гэдгийг Дамдинов захирал нэмж дурьдлаа.
"Бид Европын боловсролтой, гэхдээ дорно дахины анагаах ухааныг ашиглах чадвартай эмч нарыг бэлтгэх технологийг бий болгохыг хүсч байна" гэж тэрээр тэмдэглэн хэлллээ. Эмнэлгийн блок хангалттай том байх бөгөөд сургалтын үйл явц нь сургалтын дэвшилтэт аргуудыг ашиглах боломжийг олгохуйц зохих дэд бүтэц бүхий орчин үеийн барилгад явагдана" гэж тэрээр мөн тэмдэглэн хэлсэн юм.
