Буриадын төлөөлөгчид Харбин хотноо хятадын аялал жуулчлалын компаниудтай уулзалт хийжээ
Буриадын компаниудын танилцуулсан аялал жуулчлалын бүтээгдэхүүнүүд хятадын мэргэжил нэгтнүүдийн сонирхлыг эрхгүй татжээ.
Буриадын аялал жуулчлалын сайд Алдар Доржиев өөрийн телеграм сувгаар дамжуулж энэ тухай мэдээлжээ. Буриадын төлөөлөгчид Хэйлунзян мужийн аялал жуулчлалын удирдах газар болон хятадын аялал жуулчлалын компаниудтай уулзалт хийсэн байна.
“Манай аялал жуулчлалын компаниуд хятадын ижил салбарынхны сонирхлыг ихээхэн татсан бүтээгдэхүүнүүд танилцууллаа. Энэ уулзалт тэдний түншлэлийн харилцааны эхлэлийг тавина гэж итгэлтэй байна”, - гэж Алдар Доржиев бичжээ.
Харбин бол Хятадын өвлийн аялал жуулчлалын төв гэдгээр хүлээн зөвшөөрөгдсөн хот. Алдарт мөсний наадмыг нь үзэхээр Хятадын өмнөд мужуудаас сая сая жуулчид ийш зорин ирцгээдэг.
“Эндээс суралцах зүйл бидэнд багагүй байна”, – гэж Буриадын аялал жуулчлалын сайд итгэлтэй байна.
Харбин хотын нисэх буудлын лавлах үйлчилгээ орос хөрвүүлэгтэй байдаг. Мөн тус хотын аялал жуулчлалын газруудад орос хаяг тайлбар олонтаа байдаг нь Алдар Доржиевийн анхаарлыг мөн татжээ.
“Энэ нь Оросоос очсон зочид гийчдэд халуун дулаан сэтгэгдэл үлдээж, найрсаг энэ хотод дахин ирэх хүслийг төрүүлж байна” гэж тэр бичсэн байна.
