Өвөр Байгалийн хязгаарт «Буряад ТВ» -ийн салбар нээгджээ

Энэ мөчөөс «Буряад ТВ» анхны бүс нутаг дундын үндэсний телевизийн статустай болж байна.

- Найрамдлын гүүр Буриад болон Өвөр Байгалийн хязгаарыг холболоо. Телевизийн хамтарсан төслүүд, мэдээлэл солилцооны дүнд буриад хэл, соёл, ёс уламжлалыг хадгалж, өвлөн хөгжүүлэх ажил шинэ шатанд гарна гэж итгэлтэй байна. Буриадын иргэд Агын тойрогт болж буй үйл явдлуудын талаарх мэдээ сурвалжлага дуртайяа үзэх нь лавтай. 24 цаг гардаг анхны үндэсний телевизийн суваг «Буряад ТВ»-ийн хамт олонд үүргээ нэр төртэйгээр биелүүлэхийг ерөөе! Хэлний орчин бүрдүүлж, буриад хэл судлах, хэлний мэдлэгээ сайжруулах хүсэл сэдлийг урамшуулж байхыг хүсье. Өвөр Байгалийн хязгаарын захирагч  Александр Михайлович Осиповт телевизийн төлөөлөгчийн газрыг байгуулахад дэмжиж ажилласанд талархлаа илэрхийлье, - гэж Алексей Цыденов ярив.

Буриадын Тэргүүний болон Засгийн газрын тамгын газрын мэдээллийн бодлого, олон нийттэй харилцах, нийгмийн төслүүд эрхэлсэн дэд дарга, «Буряад ТВ» ашгийн бус бие даасан байгууллагын удирдах зөвлөлийн дарга Ирина Доржиева салбар нээгдсэнд баяр хүргэж, Өвөр Байгалийн хязгаарын захирагч болон телевизийн түншүүдэд талархал илэрхийлэв:

- Энэ телеканал бол үе үеийнхний мөрөөдөл. Бид буриад хэлээр нэвтрүүлэг бэлдэж, төсөл хэрэгжүүлж чаддаг бөгөөд энэ телевиз маань буриад хэл, соёлыг дээдэлдэг хэн бүхнийг нэгтгэдэг талбар болж чадсан юм.  Эрч хүчтэй, бүтээлч захирал Виталий Григорьевич Раднаев тэргүүтэй манай телевизийн уран бүтээлч хамт олон телевизээ сонирхолтой байлгаж, нэр төртэйгээр үүргээ биелүүлж ажиллахын төлөө маш ихийг хийдэг юм. Манай «Буряад ТВ»-д байнга тусалж, шинэ санаа оноо хэлж, нөөц боломжоороо дэмжиж, маш сонирхолтой төслүүдийг амьдралд хэрэгжүүлж байдаг түнш байгууллагууддаа талархал илэрхийлье, - гэж Ирина Доржиева тэмдэглэн хэлэв. 

Телевизийн захирал Виталий Раднаев мөн, зохион байгуулалтын  асар том ажил өрнөсөн гэдгийг хэлэв. Салбар нээх тухай анхны хэлэлцээ 2021 оны есдүгээр сарын 9-нд болж байжээ.

- 2022 оны долоодугаар сарын 23-нд Агинское хотноо «Алтаргана» олон улсын наадам дээр Өвөр Байгалийн хязгаарын захирагч Александр Михайлович Осиповтой анх уулзаж, энэхүү төслийг хэрэгжүүлэх талаар хэлэлцсэн юм. 2023 оны 2 дугаар сарын 28-нд хэдийнэ Агын тойргийн удирдлагатай Өвөр Байгалийн хязгаарт төлөөлөгчийн газар нээх тухай санамж бичигт гарын үсэг зурсан юм. Тэр өдөртөө гарын үсэг зурсны дараа бид 750 сувагтай «Ростелеком» кабелийн сүлжээг нээж байв. Хэрэглэгчдийн тоо ч 55 мянгаар нэмэгдсэн байна. Телевиз үзэгчдийн нийт тоо бараг 150 мянгад хүрчээ, - гэж Виталий Раднаев мэдээлэв.

Өвөр Байгалийн хязгаарын засгийн газраас тус телевизийн салбарыг нээхэд санхүүжилт олгосон байна. Тухайн хөрөнгөөр офисын байранд засвар хийж, тавилга, бусад техник хэрэгсэл худалдан авчээ.

Гурван жилийн хугацаанд «Буряад ТВ» 4 мянга шахам нэвтрүүлэг бүтээж, томилолтын болон студийн зураг авалтын тоо хэдийнэ 7,5 мянгад хүрчээ. Одоо тус телевизийн удирдлага  Эрхүү мужид сурвалжлагчтай болохоор төлөвлөн ажиллаж байна.